IL FAUT TUER AMMAR

8337e jour de la dictature de Ben Ali

وين تدور في الإنترنات التونسية ، ما تسمع كان “عمار” .. "عمار " كذا ، "عمار " هوني ، "عمار " غادي … وسي عمار هذا ، للي ما يعرفوش ، صنيعة ، شخصية خيالية تجسد الصنصرة والرقابة ع الانترنات ، أهوكا يفدلكو بيه ويتمقعرو عليه ، كنوع من أنواع المقاومة وهاك اللاوي . المشكلة إلي سي عمار ، الشخصية ، تخلق توا عندو برشة ، يجي خمسة سنين ولا أكثر ، والتمقعير عليه ما جاب شي . علاش زعمة ؟؟؟ على خاطرو ما قلق حد … بالعكس ، حسب رايي “عمار 404” كان عندو مفعول عكسي . على خاطر من وقت إلي طلع للدنيا ، الانترنات زادت تسكرت (الأصح سكروها ) ، لوين خلطنا عنا انترنات كيف كلاسط القحبة ، كلها نقب نقب . والضرب متع التصنصير ولا عادي ، من غير حتى تفسير مهما كان نوعو. تقولش عليه "عمار " هذا نجح انو يفرض روحو في الوجود اليومي متع التوانسة ، وقبلوه ويتعايشو معاه عادي . نزيد نسئل مرة أخرى ، علاش ، ومنين جات ها النكسة هذي ، رغم إلي فكرة التمقعير على رمز من رموز القمع نورمالمون فكرة هايلة ، وتجيب نتيجة … شبيها في الحالة هذي بالذات زادت وخرت بينا التالي ؟؟ يظهرلي إلي وقيت نعملو تحليل لشخصية عمار كرمز ، فماش ما ناقفو على مجموعة من أسباب فشل الرمز هذا.
الساعة قبل ما نبدا ، ماذابية نعمل تذكير منهجي صغير ، بش المصطلحات والتمشي يبدا مفهوم . في الألسنية ، تقامت ، من أيام إعادة إكتشاف فردينان دي سوسور على يدين جاكوبسون وبارث ، حاجة اسمها علم الدلالات ، أو السميولوجيا، تقول انو أي صورة / رمز / عبارة / كلمة ولا إلي هو ، ينجم يتقسم لزوز مكونات : الدال والمدلول ، والدلالة تحوس ما بيناتهم (تتزلبق كيما يقول لاكان ). المدلول ماهوش بالسيف المشار إليه (معناها ينجم واحد يعين “دال” بش يشير بيه لحاجة ، أما الدلالة والمدلول في شيرة أخرى ، كيما في برشة صور بلاغية كيف المجاز والطباق ، إذا كان المفارقة مقصودة ، ولا مجرد بهامة وقصر نظر ، كيما في التجودير ). في الحالة متاعنا عنا “دال” أول ، مجعول بش يشير ل"دال " ثاني. معناها فما مينيموم متع دلالة مشتركة لازم تكون موجودة بيناتهم، تتقام بيها العلاقة الدلالية ، ولا المعنى . الدال الأول هو “عمار 404” ، والدال الثاني هو "الرقيب"، المشار إليه بغرض المجاز (عافانا وعافاكم الله ). هات توا نشوفوهم الزوز ، كل واحد وحدو ، ونحللو الصور الذهنية والدلالات .
إلي يقول “عمار 404”، أول حاجة تجي لبالو هي صورة شيفور . التوانسة متعودين يعيطو لأي شيفور كار عمار . شكون فينا ما قالش نهار :“تي امشي يا عمار … يا عمار لحظة بالله خلي نهبط … يا عمار زين هاك الباب ..” وشيفور صورتو الأولى إلي تجي للمخ هي واحد شاقي ، عارق ، بين الغبابر والروايح ، متمرمد النهار وطولو . الصورة الأخرى هي "عمار بو الزور " هاك الريفي البوهالي الحلوف إلي كعبرها للي حبو يكعبروهالو . عمار زادة ، كإسم يحيل ع الريف والمناطق الريفية الداخلية . من شيرة أخرى “404” تعطي ديراكت ع الكات كات باشي ، وهي كرهبة متع فقرا ، يستعملوها برشة الفلاحة الصغار وأولاد الريف ، السمر إلي حارقتهم الشمس ونهار كامل وهوما يعبيو ويفرغو في الشكاير ، سنيهم صفر ، ولهجتهم ريفية ، ويضحكو للغريب إلي يضحك عليهم ، في بالهم يضحك معاهم . بالمختصر ، “عمار 404” يحيل طول لدلالات : التجوبير ، التمرميد ، زوالي ، عارق ، شاقي ، فقير ، محثول ، ذل الخدمة اليدوية . دلالات تختزن برشة محقرانية طبقية ، صحيح ، أما للأسف دلالات حقيقية وموجودة .
هات نشوفو توا ال"دال" الآخر ، المشار إليه ، إلي هو الرقيب . صورة الرقيب تحيل طول لصورة “بيغ بروذر” متع أورويل . سوبر – شخص موجود في كل بلاصة وفي حتى بلاصة . فيه شر و ظلم وإرادة وقوة وسلطة وقمع ومحقرانية للعباد ، وتكبر، صورة تقنوقراطي ساعة ساعة تجي كيف كيف، بارد ، ينفذ من غير ما يغزر، قلبو ميت . الرقيب عندو إرادة ، هل انو الصور إلي يستحضرها “عمار 404” فيها مكون الإرادة ؟؟؟ الرقيب قوي ، يسكر من غير ما يعلم ولا يفسر ما على بالو بحد ، هل انو مكون القوة متوفر في دلالات “عمار 404”؟؟ الرقيب صاحب سلطة ، يقمع على بعضو ، هل انو “عمار 404” يحيل من قريب ولا من بعيد إلى أي نوع من أنواع السلطة ؟؟ الرقيب بموقعو الفوقاني ، ما ينجم يكون ولا يتواجد إلا في إطار المدينة والحداثة ، و-"عمار 404 " ولد الريف …
ها الدورة الصغيرة تورينا قداش مدلولات "عمار 404 " بعيدة على مدلولات الرقيب … متناقضة معاه جملة . الفرق بناتهم كبير وما ينجمش يتعبا . وعلى قد ما ترسخ صورة عمار ، على قد ما يبعدو العباد على إدانة الرقيب ، ويدينو أرواحهم وصور جزء كبير م الشعب التونسي.
جراير “عمار 404” قعدو التوانسة اعوام يحاربو في العدو الغالط ، هذاكة علاش عادي مجهوداتهم الكل تطيح في الما. وهذي هي مشكلة “تكريز” مع “عمار 404”، ماهيش مشكلة أسبقية ولا منافسة ولا "ملكية فكرية " . سي عمار هذا كان كيف "حصان طروادة " ، مدخل تسلل بيه الرقيب لقلوب التوانسة ، لوين خذاو فكرة إلي الرقيب واحد منهم ، وفما حتى شكون يدافع عليه . هذاكة علاش برشة ما شافو حتى حرج بينهم وبين رواحهم في جواب الحشمة الموجه لبو الرقابة . ما حسوش إلي هوما إستنجدو بالرقيب الحقاني بش يعاونهم ع الرقيب الوهمي. الحديث على “عمار 404” الرقيب يشبه الحديث على "فار بوطميرة ، ملك الغابة ". لهنا ماذابيا نشير لإستثناء واحد ، إلي هو _ زاد _. _ زاد _ هو الوحيد إلي صور الرقيب بصورة تشبه حقيقتو. ولو انو إستعمل نفس التسمية ، إلا انو تصويرو للنسخة متاعو لعمار ، غرق علامة الإسم ، بعلامة/دال أقوى إلي هي الصورة.
لازم نقتلو “عمار 404” ، ونتعداو للرقيب الحقاني . صحيح تسميتو مباشرة تنجم تكون صعيبة وتصعد اللغة على برشة يحبوا ممارسة شطر سرية شطر علنية . احنا في تكريز ، ما عناش المشكلة هذي . انتوما سميو الرمز الجديد ، واحنا نسموه باسمو : “بن علي”. المخاخ إلي طلعت ب-“عمار 404” وهي تفكر في الشيرة الصحيحة ، بطريقة غالطة ، مازالت قادرة تجيب إسم أخر ولا أيقونة أخرى أصح وبالخصوص أنجع